Le massere
PERSONAGGI
La signora Costanza.
Il signor Raimondo suo Marito.
La Signora Dorotea.
Zanetta Serva della Signora Dorotea.
[a] Donna Rosega Serva della Signora Costanza.
Il Signor Biasio Vecchio.
Gnese Serva del Signor Biasio.
Meneghina.
Anzoletto Giovine di Mercante.
Il Signor Zulian.
Titta Cameriere del Signor Raimondo.
Momolo Garzone di Fornaio.
La scena si rappresenta in Venezia.
Il titolo di Donna si dà in Venezia alle femmine ordinarie di età avvanzata.
ATTO PRIMO.
SCENA PRIMA.
Strada con due case, una della Signora Costanza l’altra della Signora Dorotea.
Momolo Forner, poi Zanetta, poi Donna Rosega.
momolo (dopo avere alcuna volta fischiato)
Ste massere le dorme e le me fa subiar. 1
Vòi batter alla porta, vòi farle desmissiar. (batte da Zanetta)
zanetta Oe Forner, aspetté! (di dentro)
momolo Cossa voléu da mi?
No xélo un quartariol, come el solito?
zanetta Sì.
momolo Félo subito.
zanetta Adesso v’ho da parlar, ve digo. 5
momolo Gh’ho pressa, tardi xe.
zanetta Presto, presto, ve sbrigo.
momolo Col vento e colla brosa no gh’ho gnente de gusto.
zanetta Aspetté, caro fio, fin che m’impirò el busto.
momolo Intanto batterò da st’altra vecchiarela.
Oe, suso! Donna Rosega! La xe in letto anca ela… 10
Gh’ho pazienza co queste, co le ha da far el pan,
Perché sempre qualcossa ghe cavo dalle man.
Da resto colle altre son rustego anca mi,
Quando ho subià una volta no le me sente pì.
zanetta Momolo! (alla finestra)
momolo Benlevada!
zanetta Oh, che freddo che xe. 15
momolo Avéu impizzà el fogo?
zanetta No, gnancora. Dixé,
Me faressi un servizio?
momolo Se posso, perché no?
zanetta Caro forner, ve prego, no me dixé de no.
momolo Mo via, cossa voléu?
zanetta Mi me bisognerave…
Oe, la patrona chiama, me fazzo dar le chiave. 20
La le tien sul scabelo, no posso far un passo.
Dirò che xe el fachin e vegnirò da basso. (entra)
momolo Cossa mai vol custìa? Vòi aspettarla qua:
spero che da marenda fursi la me darà.
Ma de qua no se vede averzer i balconi 25
(osservando le finestre dell’altra casa).
Le usa ste massere dormir più dei paroni.
Tasé, tasé! Me par… sì ben, la se cognosse.
La vecchia xe levada, la cognosso alla tosse.
Donna Rosega, presto! Tre volte ho comandà,
E po diré co vegno el pan no xe levà. 30
d. rosega Chi me chiama?
momolo El forner.
d. rosega Seu vu forner?
momolo Son mi.
d. rosega L’avèmio da far subito?
momolo Subito, siora sì.
d. rosega Che ora xe?
momolo No vedeu l’alba che sponta fuora?
d. rosega Oh malignazonazzo! Perché vegniu a st’ora?
Me pareva caligo, vedendoghe pochetto. 35
Co xe cusì a bon’ora voggio tornar in letto.
momolo Via, za che sé levada, da brava, destrighéve.
d. rosega Cossa voléu che fazza? Sola me vien la freve! (a)
Se vegnissi anca vu a agiutarme a domar…. (b)
Vegnì, caro forner.
momolo Cossa me voléu dar? 40
d. rosega Tutto quel che volé. Faremo una fugazza.
Gh’avemo del vin bon, ve ne darò una tazza.
Ne xe avanzà da gieri un cappon tanto fatto:
Ghe dirò alla parona che l’ha portà via el gatto.
La crierà un pochetto, e po no farà gnente; 45
Caro forner, vien suso. Staremo allegramente.
Che te averza la porta?
momolo (Squasi squasi anderia.)
d. rosega Vustu, che vegna?
momolo Sì.
d. rosega Vegno zo, vita mia. (entra)
momolo Intanto magneremo, e po cossa sarà?
Se no torno a bottega el paron crierà. 50
Che el cria, cossa m’importa? Sta mattina ho fenio,
Ho comandà per tutto.
zanetta Vegnì qua, caro fio, (esce dalla porta)
Dalla porta de casa no me vòi slontanar.
momolo Son qua, siora Zanetta.
zanetta Vu m’avé da agiutar.
momolo Comandé, in quel che posso! Oe, m’avéu portà gnente? 55
zanetta Tolé sto buzzolà che ve curaré un dente.
momolo Grazie tanto.
zanetta Sentì. Mia zermana gier sera
M’ha domandà del pan, e pan no ghe ne giera.
La gh’aveva con ela el fantolin. La dise:
“Oe no ti ghe dà gnente, zermana, a ste raise?”. 60
Mi che son de bon cuor (no ghe giera i paroni)
Vago all’albuol de posta e fazzo i maccaroni.
Oe, ghe n’ho fatto tanti, che ha calà la farina:
No ’l sarà gnanca mezo el pan de sta mattina!
Savé che la parona la par una de quele 65
Che scortega el peochio per avanzar la pele,
E se la se ne acorze, sì per diana de dia,
Che la me dà dei schiaffi e la me cazza via.
momolo Cossa v’hoggio da far?
zanetta Vu solo, se volé,
In sto caso che son, agiutarme podé. 70
Vu podé presto presto trovarme sta mattina
Per metter in albuol sto poco de farina.
momolo Dove l’hoi da trovar?
zanetta Qualcun ve la darà,
Troveré qualche serva che ve la impresterà.
Oe, fé cusì: andé al forno, dove ghe n’è toléla, 75
Tolé sto tovaggiol, se ghe ne xe portéla.
Za vu altri forneri fé el pan per le casae,
Podé slongarghe el colo con della broda assae;
El cusiné pochetto perché el pesa de più,
Podé robar per mi, za che robé per vu. 80
momolo Ma mi, siora Zanetta, no fazzo miga el pan,
Mi comando.
zanetta E per questo? Vu no gh’avé le man?
Tior no podé in scondon un poco de farina?
momolo Per le casae l’è fatto el pan de sta mattina.
zanetta E per questo? Se varda, co ghe n’è se ne catta. 85
Se averze qualche sacco, se averze la buratta.
Co se vol far servizio, se fa quel che se vol.
momolo Cossa me doneréu?
zanetta Ve dono el tovaggiol.
momolo E la parona?
zanetta Oh bella! Dirò che no ’l ghe giera,
Ghe dirò che l’ha perso un dì la lavandera. 90
Sta farina me preme. (Donna Rosega apre la porta)
momolo Mi no so come far.
zanetta Donna Rosega. Ella ve la poderia dar. (osservando, che Donna Rosega è sulla porta)
d. rosega Momolo, dove seu?
momolo Son qua.
d. rosega Bon pro ve fazza.
Cossa févi, sior sporco, là con quella pettazza?
momolo Ve dirò, poveretta, la vorria sta mattina 95
Che ghe trovasse in prestio un poco de farina.
d. rosega L’hala magnada?
momolo Sì, far el pan no la pol.
d. rosega Gh’hala bezzi?
momolo In baratto la dà sto tovaggiol.
d. rosega Lassé veder.
momolo Tolé.
zanetta (Debotto me vergogno.)
momolo Déghela vu.
d. rosega Sì ben, ghe darò el so bisogno. 100
Oe, tegniremo intanto el tovaggiol in pegno.
Ma sentì, sto servizio la ’l gh’ha per vu, m’impegno.
momolo Ve ringrazio.
d. rosega Zanetta.
zanetta Cossa voléu?
d. rosega Sentì,
Se volé la farina mandé de su da mi.
Momolo, vegnì via che ghe la porteré. 105
zanetta A tormela de suso vegnirò, se volé.
d. rosega No, no, no femo strepito. Za ve la mando.
zanetta Aspetto.
d. rosega Voggio che andemo soli; vien con mi, Momoletto. (entra con Momolo) 108
SCENA II
Zanetta, poi Gnese.
zanetta Donna Rosega almanco quel che la vol la fa. 1
La pol far sporco in letto e dir che l’ha suà,
La pol far alto e basso, nissun ghe varda in becco,
Ma mi la mia parona la me fa star a stecco.
Gnanca un boccon de pan no gh’è co ghe ne voggio, 5
Sotto el letto la tien fin el pavero e l’oggio.
E po quando la zoga la va zo col brenton.
Za chi tien per la spina spande per el coccon.
gnese Oe, Zanetta!
zanetta A bon’ora.
gnese Cossa dixéu? Son qua.
Cara fia, un secchio d’acqua?
zanetta No ghe n’è gnanca un fià. 10
Xe tre dì che se pena, no ghe n’avemo un giozzo.
Mi per far el levà giersera ho sugà el pozzo.
E la parona cria co i vien con el bigolo,
Gieri de quattro secchi la gh’ha dà un soldo solo.
gnese Quando che ghe n’avemo nu, ghe ne demo a tutti, 15
E per darghene ai altri adesso semo sutti.
zanetta Andé da Donna Rosega, ella che la ghe n’ha,
che i ghe n’ha messo in pozzo: ella ve ne darà.
gnese Me proverò. O de casa!
SCENA III
Donna Rosega alla finestra, e dette.
d. rosega Chi batte?
gnese Cara siora, 1
Deme un secchio de acqua.
d. rosega Le scomenza a bon’ora…
No ghe ne xe.
gnese Ve prego.
d. rosega No ghe n’avemo più!
gnese No ghe n’avéu comprà?
d. rosega Compréghene anca vu. (entra)
gnese Co ghe ne compreremo…Vardé là che bel sesto! 5
No la me vol dar acqua, e la me volta el cesto?
zanetta Bisogna compatirla, perché avé da saver
Che la gh’ha zente in casa.
gnese Chi mai gh’hala?
zanetta El forner.
gnese Còntela el pan?
zanetta Oibò, la xe con quel putelo…
gnese Con Momolo forner?
zanetta Sì ben, giusto con quelo. 10
gnese Ca de diana! Una vecchia da metter in aseo
La sta con quel putelo, che no xe longo un deo.
Cossa diséu? Sta vecchia la fa la fantolina…!
SCENA IV
Momolo, e dette.
momolo Son qua, siora Zanetta, v’ho portà la farina! 1
zanetta Bravo, vegnì con mi.
gnese Zanetta, dove andéu?
zanetta Vago a far un servizio.
gnese Sto secchio me lo déu?
zanetta No ghe n’ho cara vecchia. Presto, andemo de suso. (entra con Momolo, e chiude la porta)
gnese Frasconazza! La porta la me serra int’el muso? 5
Chi credistu che sia? Se non ti sa chi son
Te lo farò saver, ghe lo dirò al paron.
El paron che me tien come una so sorela,
Che in casa el m’ha arlevà se pol dir da putela,
Che mai el me rimprovera, che mai nol me strapazza, 10
Vòi che el sappia l’affronto che abuò da sta petazza.
Oh, vien Sior Anzoletto: l’è un putto che me piase,
Ma che el me trova qua col secchio me despiase.
SCENA V
Anzoletto, e Gnese.
anzoletto Cossa féu Siora Gnese?
gnese Son qua, no me vedé?
anzoletto Comandé, cara fia.
gnese Grazie, che gnanca che.
anzoletto V’offendio a domandar? Cossa gh’avéu con mi?
Avéu bisogno de acqua? Ghe ne voléu?
gnese Sior sì.
anzoletto Battemo a qualche porta. Son qua, ve agiuterò. 5
Cara Gnese, sié bona. Me voléu ben?
gnese Sior no.
anzoletto Sto “Sior no” troppo presto l’avé lassà scampar;
Vedo che l’avé dito cusì, senza pensar.
Ma se me varderé, se ghe pensé un pochetto
No parleré cusì.
gnese Oh, che caro Anzoletto! 10
Qualche volta dasseno me fé rider de cuor.
anzoletto Oe, cossa fa el paron? Dòrmelo Sior Dottor?
gnese L’ho lassà che el dormiva, credo che el dorma ancora.
anzoletto Voléu vegnir con mi?
gnese Dove?
anzoletto Za xe a bon’ora.
A bever un caffè.
gnese Son cusì, me vergogno. 15
anzoletto Eh, andemo.
gnese Ma dell’acqua ghe n’ho tanto bisogno!
Se…
anzoletto Da quel dalle acque i ve impenirà el secchio.
gnese Vegniràve, ma po se se desmissia el vecchio?
anzoletto Presto, se destrighemo.
gnese Fé cusì, aspetté qua.
Più tosto anderò a casa a metterme el zendà. 20
Se Sior Biasio dorme, chiappo su e vegno via.
Se el sente, se el me chiama, dirò qualche busia.
anzoletto Brava, andé, che v’aspetto.
gnese Ma el secchio, chi lo porta?
anzoletto Aspetté, cara fia, battemo a quella porta.
gnese No, no, con Donna Rosega no parlo e no ghe batto. 25
La m’ha dito za un poco un de no tanto fatto.
anzoletto Lassé che prova mi.
gnese Ben, se volé, prové.
anzoletto Déme quel secchio!
gnese El secchio?
anzoletto De mi no ve fidé?
gnese Per fidarme me fido, ma un putto co se dié
Andar col secchio in man…
anzoletto Qua nissun no ghe xe. 30
Déme quel secchio a mi, no gh’ho certi catari.
Oh, quanti contrabandi se sconde coi tabari!
Se savessi… se porta quando se gh’ha el morbin
Sportele, tovaggioli, canevette de vin.
Vedéu ste macchie? Un zorno sotto el tabaro ho sconto 35
Una polenta conza!
gnese Sé ben onto e bisonto!
anzoletto Lassé veder sto secchio, tiréve da una banda,
Vardé co fazzilmente se batte e se domanda.
O de casa! (batte)
SCENA VI
Donna Rosega, e detti.
d. rosega Chi è?
anzoletto Amici.
d. rosega Amici boni? (viene alla finestra)
anzoletto Bonissimi.
d. rosega I xe in letto.
anzoletto No domando i paroni.
Ho bisogno de vu.
d. rosega De mi, Sior Anzoletto?
Vegno da basso subito! (entra)
anzoletto Fé presto, che v’aspetto.
gnese Oe, sentì: colla vecchia no stessi a far el matto. 5
Savé che Donna Rosega se taccheràve a un gatto.
anzoletto Lassé pur che la fazza, a mi no la se tacca;
E po son tutto vostro…
gnese No credo una patacca.
anzoletto Véla qua, che la vien.
gnese Me scondo, me retiro:
No vòi che la me veda. Fazzo in sto mentre un ziro. (parte) 10
SCENA VII
Anzoletto, e Donna Rosega.
d. rosega Son qua, cossa voléu?
anzoletto Me faressi un piaser?
d. rosega Basta che comandé, ve ne farà anca un per.
anzoletto Vorràve un secchio d’acqua.
d. rosega Sé paron caro vecchio,
Del pozzo, della casa, dell’acqua, e anca del secchio.
anzoletto El secchio lo gh’ho qua.
d. rosega Oh siestu malignazo! 5
Soto el tabaro el secchio? Cossa vol dir sto lazo?
Bisogna ben, sior sporco, che la prema assae.
anzoletto Son stà pregà.
d. rosega Se vede chi xe le fortunae…
Per mi no lo faressi, e sì… no digo gnente.
anzoletto Qua no ghe xe nissun, parlé liberamente. 10
d. rosega De mi, Sior Anzoletto, se fessi capital,
Fursi che el vostro tempo no traressi de mal.
anzoletto Comandéme, prové.
d. rosega Cossa voléu che prova?
Dixé, quella dell’acqua xela amicizia nova?
anzoletto Dasseno, Donna Rosega, la xe una mia parente. 15
d. rosega Tocco de baroncello, mi no te credo gnente.
anzoletto La xe cusì da putto.
d. rosega Basta, lo vederò.
anzoletto Me déu sto secchio de acqua?
d. rosega Sì ben, ve lo darò.
anzoletto Via, da brava.
d. rosega Ve ’l dago, ma con el cuor strazzà. (prende il secchio)
anzoletto Per cossa?
d. rosega G’ho paura… No sarave un peccà 20
Che un putto come vu se perdesse cusì?
Quanto faressi meggio, se me tendessi a mi.
Sentì, son una donna che gh’ha i so boni anetti
Ma gh’ho, ve lo confido, da banda dei bezzetti.
M’ho sempre sparagnà, no gh’ho certi malani 25
Basta… no ghe la cedo a una de vint’ani. (parte)
SCENA VIII
Anzoletto, poi Zanetta, e Momolo.
anzoletto La xe ridicolosa. Oh, che cara vecchietta! 1
Ancora la gh’ha voggia de far la morosetta!
La xela spiritosa, franca, bizara, ardita…
Mi mo, co ste massere, mi ghe vago de vita.
No ghe ne spendo uno, e stago alegramente; 5
E po, che belle cosse che da custìe se sente!
Se sa i pettegolezzi de tutti i so paroni,
De questa e de quell’altra le dixe i pettoloni,
Chi al zogo, chi al teatro spende le notte intiere.
El mio divertimento xe a star colle massere! 10
zanetta Momolo, la xe dita.
momolo Farò quel che volé.
anzoletto Xe qua un’altra massera! (vedendo venire Zanetta)
zanetta A parecchiarve andé. (a Momolo)
momolo Cossa dirà el paron se stago tutto un zorno?
zanetta Se el ve licenzierà, troveré un altro forno.
Andéve a immascherar, ma presto se se pol. 15
momolo Vago un abito a nolo a tor dal strazzariol. (parte)
anzoletto Putta, bondì sioria.
zanetta Patron, Sior Anzoletto.
anzoletto Stéu ben?
zanetta Cusì e cusì.
anzoletto Ve divertìu?
zanetta Un pochetto.
anzoletto Chi xelo quel puttazzo che parlava con vu?
zanetta El putto del forner, no l’avé cognossù? 20
anzoletto El se va a immascherar?
zanetta Sì ben, l’avéu sentio?
anzoletto L’ho sentio, ghe dirave de quei che l’ha nanio.
zanetta Perché?
anzoletto Perché ne tocca a nu altri Veneziani
Veder el meggio e el bon in man de sti Furlani.
Un tocco de forner de vu sarà paron, 25
Se un Venezian vegnisse, diressi: “El xe un baron”.
Basta, ghe vol fortuna.
zanetta Caro Sior Anzoletto,
Se disessi dasseno, el forner me lo petto.
Ancuò gh’ho la zornada, e per non andar sola
Xe capità el forner, gh’ho dito una parola. 30
Ma se vu ve degnessi vegnirme a compagnar
Momolo lo licenzio, lo mando a far squartar.
anzoletto Sì ben, ma discorémola un poco tra de nu.
Cossa dirà i paroni se mi vegno con vu?
zanetta Mo, ve dirò, compare, no son miga una matta. 35
Se va fora de casa, e dopo se se catta.
Ghe sarà una mia amiga, za nissun ne vien drio.
Ela troverà el soo, e mi troverò el mio.
anzoletto Brava, se troveremo…
zanetta In dove che volé.
anzoletto Zo del ponte del Lovo, da quello del caffè. 40
zanetta La xe dita.
anzoletto A che ora?
zanetta Avanti mezo dì.
anzoletto In maschera, n’è vero?
zanetta In maschera, Sior sì.
anzoletto Vardé ben.
zanetta La xe dita, me vago a destrigar.
anzoletto Gh’avéu delle fazzende?
zanetta Oh, gh’ho tanto da far.
Ma quando ho fatto el pan, m’ho destrigà del più. 45
anzoletto Vòi che se la godemo.
zanetta Oe, ghe penseré vu. (entra in Casa)
SCENA IX
Anzoletto, poi Donna Rosega.
anzoletto Voggio goder per diana, me voggio sbabazar. 1
Oh, se podesse in maschera sta vecchia strascinar!
E Gnese? No la puol vegnir con nu? Perché?
Son bon anca per diese, se no basta per tre.
d. rosega Presto, tolé sto secchio.
anzoletto Coss’è, che sé instizzada? 5
d. rosega Sì ben, ho visto tutto: no vòi esser burlada.
anzoletto Con mi? Cossa v’hoi fatto?
d. rosega V’ho visto a chiaccolar.
anzoletto Oh, ve conterò tutto.
d. rosega Andéve a far squartar!
anzoletto Sentì, gh’intré anca vu in quel che s’ha parlà.
d. rosega De mi cossa avéu dito?
anzoletto Aspetté, vegni quà. 10
Far una mascherada s’ha dito tra de nu.
Zanetta con un altro, mi in compagnia con vu.
Voléu vegnir con mi?
d. rosega Mi sì che vegnirò.
anzoletto Ve daràli licenzia?
d. rosega Ghe la domanderò.
E se de no i me dixe, ca de diana de dia, 15
Impianto i mi paroni, chiappo su, e vegno via.
anzoletto Ve vegnirò a levar.
d. rosega Vardé ben che ve aspetto.
Za el pan l’ho fatto e presto scoo e fazzo suso el letto.
anzoletto Ve immascheréu?
d. rosega Seguro che me inmaschererò.
Fin che i paroni dorme, l’armer averzirò. 20
Me torò una carpetta, torò un abito bon,
E anderò a imascherarme da mia nezza in scondon.
I abiti che gh’ho da maschera i xe brutti,
La roba de sto mondo la gh’ha da far a tutti.
anzoletto Via, da brava, fé presto. Me inmaschero e ve aspetto. 25
d. rosega Vòi che se la godemo. Oh, che caro Anzoletto! (parte)
SCENA X
Anzoletto, poi Trottolo.
anzoletto E do. Voggio trovarghene qualchedun’altra ancora. 1
Vòi unir ste massere, vòi devertirme un’ora.
Ma Gnese no se vede, la m’ha impiantà cusì?
Coss’hoi da far del secchio? Ghe l’hoi da portar mi?
Se passasse qualcun… Oe putto, vegnì a nu! 5
trottolo Son qua, cossa comàndela?
anzoletto Gh’ho bisogno de vu.
Porteressi sto secchio?
trottolo Sior sì lo porterò.
anzoletto Andé zo per de là, che drio ve vegnirò. (Trottolo parte)
Se i mi amici me vede andar col secchio arente
I me vegnirà drio: no vòi che i sappia gnente. 10
Tutti se devertisse, chi in questo e chi in quel modo,
E mi colle massere gh’ho spasso e me la godo.
El star in suggizion me par cossa da alochi.
Mi me deverto assaeo, ma ghe ne spendo pochi. (parte)
SCENA XI
Camera in Casa di Dorotea.
Raimondo, e Zanetta.
zanetta Sior sì, la xe levada, ma no l’ha averto ancora. 1
Prima che la sia all’ordene ghe vorà più de un’ora.
raimondo Ho un interesse in piazza che m’obbliga d’andar.
zanetta La vaga se la vol, la poderà tornar.
raimondo Ditemi il ver, Zanetta, la vostra padroncina 5
Ha per me qualche stima?
zanetta La xe una testolina
Che… no saveria dir. Segondo che s’imbatte,
Ora la xe da uovi, ora la xe da latte.
raimondo Per me le parlereste?
zanetta No vorla? Gh’ho parlà.
(No me l’insogno gnanca, gnanca no gh’ho pensà.) 10
raimondo Delle parole vostre fate che senta il frutto!
Dite, che cosa ha detto?
zanetta No ghe voggio dir tutto.
raimondo Ma pur come gradisce l’idea che ho di servirla?
zanetta No ghe xe so mario, bisogna compatirla.
raimondo Non vi capisco bene. Vuole, o non vuol per questo? 15
M’intendo di servirla da galantuomo onesto.
zanetta La senta, Sior Raimondo, parlo col cuor in man:
La parona mi spero disponerla pian pian.
Ma… capìssela, Sior?
raimondo Via, parlatemi schietto.
zanetta A tempo qualche volta fa colpo un regaletto… 20
raimondo Se troppo ardir non fosse…
zanetta Eh, che quando se dona
El xe un ardir che tutte le femene perdona.
raimondo Se il suo genio sapessi, lo farei volentieri.
zanetta La senta una desgrazia che xe successa gieri.
La parona al balcon giera fora canal, 25
L’ha ponta un vero rotto, e la s’ha fatto mal.
Scolando el sangue in acqua con el deo menuelo,
Per diana, che in canal ghe xe cascà l’anelo!
Vòi mo dir… compatime se disesse un sproposito…
Un anelo in sto caso saràvelo a proposito? 30
raimondo Di qual prezzo era quello che Dorotea ha perduto?
zanetta Mi credo che el valesse diese zecchini in tuto.
raimondo Questo mi costa sedici.
zanetta Donèghelo a dretura.
Cusì col cavedal la gh’averà l’usura.
raimondo Ma come è mai possibile ch’ella da me l’accetti? 35
zanetta Oh se la lo torà!
raimondo Voi fate che io sospetti.
S’ella da me il riceve, s’ella i regali apprezza,
A prenderne dagli altri questa signora è avvezza.
zanetta Questo po no, ghe zuro certo sull’onor mio,
Xe debotto sie mesi che manca so mario. 40
Regali no l’ha abuò, nissun l’ha praticà,
E gnanca la tiorave sto anelo che xe qua.
Ma avendo perso quello… No so se la m’intenda
Pol esser, se ghe parlo…
raimondo Puol essere che lo prenda.
zanetta Mi po so el con, e el ron, e so dove ghe diol. 45
Basta, Sior Raimondo, intenderme la pol.
raimondo Non so che dir, poss’io far questa prova ancora:
Io vi darò l’anello per darlo alla Signora.
Ma sentite, Zanetta, di voi mi fido, è vero,
Mediante l’opra vostra che l’aggradisca io spero; 50
Ma sapendo ch’io sono di tanta grazia indegno,
Del gradimento suo vorrei un certo segno.
zanetta Crédelo che lo toga per metterlo in aseo?
Ve basta, Sior Raimondo, de vederghelo in deo?
raimondo Questo mi basterebbe.
zanetta Donca cusì sarà. 55
La gradirà l’anello, e la lo porterà.
raimondo Eccolo… ma badate…
zanetta Ih, ih, tanto ghe vol
In sta sorte de cosse no occorre dir me diol.
raimondo Mi raccomando a voi, oprate da valente.
zanetta La lassa far a mi, per mi za no vòi gnente. 60
raimondo Il mio dover lo so.
zanetta Ho sentìo a dir cusì:
Una man lava l’altra, e tutte do el sior sì.
raimondo Siete una gran ragazza! Eccovi un ducatello.
zanetta Grazie, grazie! (Za el resto caverò da l’anello.)
raimondo Verrò per la risposta.
zanetta La vegna a mezzo dì. 65
raimondo Ci verrò senza fallo.
zanetta (Ma no ghe sarò mi.) (da sé)
raimondo Ehi, no ’l dite alla Rosica, no ’l sappia mia consorte
Ch’io feci un passo tale, ch’io venni in queste porte.
zanetta Mi no parlo seguro. La gh’ha sta bruta usanza?
Donca, la xe zelosa de lu Siora Costanza? 70
raimondo Una donna buonissima fu ognor la moglie mia,
Ma sempre ebbe il difetto di pazza gelosia.
zanetta E lu, xelo zeloso?
raimondo Io no, anzi vorrei,
Ch’ella si divertisse.
zanetta No la gh’ha cicisbei?
raimondo Non pratica nessuno. Procuro qualche amico 75
Condurre a divertirla, faccio per essa, e dico
Servirla onestamente alcuno anche ha provato,
Ma al terzo o al quarto giorno si è ciascuno stancato.
zanetta Cossa vol dir? Perché?
raimondo Tutto l’è indifferente.
Non gusta alcun piacere, non ha voglia di niente. 80
zanetta Come saràve a dir… Oh, chiama la parona.
raimondo Posso restar…?
zanetta Sior no! La vaga, la perdona.
La torna co gh’ho dito, la lassa far a mi.
raimondo Innanzi mezzo giorno ci rivedrem.
zanetta Sior sì.
raimondo Chi sa ch’io non la spunti? Talor son le massere 85
Provide mediatrici, provide consigliere. (parte)
zanetta Che caro Sior Raimondo! In verità el xe belo,
Ghe piaxe la parona, el ghe dona un anelo!
El vol che mi ghe parla, che l’azzalin ghe bata.
Zanetta Pappasugoli xe una putta onorata! 90
Sto mistier no so farlo, nol voggio far per elo,
Ma me despiaserìa se perdesse sto anelo.
Qualche bella maniera trovar bisognerà
De vadagnar l’anelo co un poco de onestà.
Ghe penseremo suso, co se vol se se inzegna: 95
S’impara dalle altre, e la natura insegna. (parte)
Fine dell’Atto Primo.