Dittico Corner-Venier
[I]
Del detto magnifico Cornaro
Pò far Domenedio che non me passa
anchora sto martello de costia?
Tante coionarïe sé mo massa: 3
voler crepar drio d’una ch’è sbasìa
xé co’ sarave a medegarse un brazzo
et haver in la testa una ferìa. 6
Così sto sospirar ch’adesso fazzo,
sto non arfinar mai né dì né notte
da far co le me lagrime gran sguazzo, 9
me comenza a cagar su le ballotte:
oh, cazzo, la sarave de velùo
che non podesse star saldo alle botte! 12
E vogio ben che m’habbia rencresùo
che sta povera puta sì sia stà
tosegà da sto can buso fotùo: 15
mo che debbio mo mi se l’è crepà,
se non g’è pì remedio al fatto so?
Viver co’ viverave un desperà? 18
No che no ’l vogio far, no, madinò!
Ché co’ crepasse, po tutti dirave:
«Oh che murlon, oh che bestia, oh che bò!», 21
e, per Dio santo, ché non caterave
can certo che sentisse dispiaser,
anzi la terra me bertizerave. 24
Però son ressoluto che, a compier
de sugarme le lagrime che piove
e ressanarme con qualche piaser, 27
vogio principïarla a cose nove,
benché haverò da far cantar nissuna
che sia co’ quella, che tutte xé love. 30
Pur farò prova della mia fortuna:
la terra è grande e per gratia de Dio
no g’è donne da ben d’ogni cent’una; 33
squasio tutte le liga a so marìo:
chi ’l fa per soldi, chi ’l fa da morbin,
chi ’l fa per atto che se ge dà drio, 36
tanto che tutte fan le malefin.
E mi, bestia futùa, starò a sgnicar,
possando trïonfar da fantolin? 39
No, madinò, che mi no ’l vogio far!
L’è passà a so marî, a so fradelli,
non è honesto ch’anche mi lassa ’l sbragiar? (+2) 42
Non è honesto che comenz’ a bordelli,
e che sti quatro dì di carneval
spenda anchor mi sul ballo sie marcelli? 45
Che diseu cha, Venier, farò io mal?
Sarò io galant’homo a far così
o pur me tratereu da bordonal? 48
Mo podestu così ballar con mi,
co’ credo che fassè ben de gambetta?
Pur spero anchor de balarli un dì. 51
E se la vostra sorte maledetta
ve domina a sta foza, spiero anchora
vederla un zorno a farve de baretta. 54
Me conseieu che cata una signora?
Oh, la voio catar de capellina,
alla fe’, che squasio el mi par hora. 57
Vogio che la sia biancha e molesina
e granda sora il tutto e ben formà,
non la voio per niente picinina; 60
che l’habbia do manine delicà,
che la sia po piasevol e trepposa,
ché l’inzegno in le donne importa assà. 63
S’haverò de sta taia una morosa,
credeu, se Dio ve daga sanitàe,
che la morte del proximo ve nosa? 66
Credo ch’inchageria quant’è crepàe,
e che starò su mazor petachine
che non fan qui ch’han vin fresco l’estàe. 69
L’homo che no sta saldo alle roine
mostra pocha saldezza inte ’l cervello:
chi vive al mondo ha delle romancine. 72
Fin ch’un re ha la guardia d’un castello
el diè far ogni cosa per guardarlo,
che ’l ceder sempre è cosa da ribello; 75
ma co’ no se pol pì, forz’è lasciarlo,
cerchando di trovar qualch’altro luogo,
e in scambio di quel perso conservarlo. 78
Così anche mi, fradel, zogo a sto zogo:
za ch’ho perso il mio amor, cerco da novo
brustolar el mio cuor con altro fuogo. 81
Oh, la voio far grande co’ la trovo,
voio saltarge a dosso da affamào
e rabïoso, che parerò un lovo. 84
E qua, perché son massa desgrezào,
ge farò le pì care carezine
ch’habbia mai sapù’ far imbertonào. 87
Dirò: «Ben mio, di chi è le to tetine,
di chi sé sta mozetta damaschino?
Quando saremo su le petachine 90
slonga il museto, fia, dame un basino;
co la petegoletta per canton,
buta, cagna, che femo un fantolino. 93
Ah fotùa, mo che vuo’ li pizigon,
voltate un poco in là, lassa che ’l tocca:
oh Dio, l’è pur duro, l’è pur bon!» 96
E se per sorte la sarà una gnocca,
sanza troppo parlar, troppi zigori,
int’un tratto faren el beco a l’occa. 99
Se la sarà mo giota, e mi ent’i ori
anderò bagolando co ’l peota
per tirarla al mio Dio senza criori. 102
«Tu senti, mare mia» dirò «co’ ’l scota:
lassamel rafrescar in sto busetto,
che ge sé massa fogo inte la pota». 105
Chi sarave colia che co un sgrignetto
no respondesse: «To’, cazza, no un cazzo,
ma cazzaghe un pugnal, caro Benetto!»? 108
Che ve par? Me prepar io un bel solazzo:
saverò io passar la fantesia
e incagar alla sorte inte ’l mostazzo. 111
Chi vol star mal, malan che Dio ge dia!
S’ho pianto un pezzo, l’è stà cosa honesta;
andar de longo mo la sé pacia. 114
Voio sto poco viver che mi resta
viver co’ vive ’l capitan Orlando,
ciò è co pochi grilli inte la testa; 117
perché fra mi me son andà pensando
che chi se tuò la vita e chi s’accora
fa un maron, per Dio santo, troppo grando! 120
Perché mi par squasio che sia l’hora
che vaga al sbrogio, qua fermo la pena.
Subito po che trovo la signora 123
ve ne scriverò un’altra pì de vena.
[II]
Del Venier al Corner
Quando ve digo che nisun ve passa
e che vu non havé par in poesia,
perché vu dirme che la taio grassa? 3
Perché vu dirme che la zé busia?
Che [ghe] n’è ben qualcun de vostro brazo,
e che vu no sé vu ’l primo che sia? 6
E qua de mi vu ve tolé solazzo,
me dé la baia e me cazé carotte
con dir ch’a ponto mi son in quel mazzo. 9
Mo stemo in ditto de persone dotte:
vu vederé zò ch’i dirà daspùo;
sarave matto ben de sette cotte, 12
sarave ben da tutti cognossùo
per un alocco e per matto spassà,
se me tegnisse quel che sé tegnùo. 15
No se vede da tutti, no se sa,
si son da metterme con vu, o no
sarave ben insìo del semenà. 18
Questo ve digo per mostrarve mo
che fé versi sì bei, rime sì brave,
che d’arivarve ognun si ha tolto zó. 21
Vu ve fé tutte le persone schiave:
co’ se leze de i versi del Corner
perfina un morto se l’ariderave. 24
Mo no vorave za, caro missier,
rasonar tanto de le vostre pruove,
e no ve dir del resto il mio parer. 27
Però sapié che, quant’aspetta a dove
volé de fie catarvene qualcuna,
che le rason che vu disé me muove. 30
No la puol durar troppo un che dezuna:
quand’un non magna in tutt’un dì compìo,
zé forza sé ch’el magna a notte bruna. 33
Vu sé stà tanto a pianser il zodio,
v’havé tanto sbatù, gramo meschin,
sé stà per tanti dì morto sbasìo, 36
e per quanto a morose sé stà, fin
ch’havé podesto mai, gramo a chiavar,
daspuò ch’è morto el vostro coresin, 39
mo, poveretto, no podé pì star;
vu no sé un Corner de sti mengrelli:
ch’è, che non è, vu ve volé sborrar. 42
Vu no sé un Corner, no sé de quelli
che no ghe tira troppo el natural
d’andar spesso a la cazza de sti oselli; 45
vossè d’ogn’hora vu star su cotal,
che star a perder tempo, madesì;
vossè d’ogn’hora averzer vu ’l messal! 48
Mo chi ve tien, chi ve ’l deveda? Chi,
che no ve ne trové qualcuna eletta,
za che culia no puol tornar mai pì? 51
Che, si morivi inanti l’Artusetta,
possa morir si essa a l’hora a l’hora
la no s’havesse fatto dar la [s]tretta! 54
No ghe pensé pì su, felo in bon’hora:
cateve qualche brava paladina,
o che solo o ch’altri la lavora. 57
Perch’ogni modo tutt’è una farina:
l’è tutte quante d’una caratà
che le se fa chiavar sera e mattina. 60
Desmentegheve quella ch’è passà,
che, se la giera ben miracolosa
tanto che l’incantava la brigà, 63
se la giera ben bella e gratïosa,
che credeu che tra tante ch’è restàe
no ghe sia qualcun’altra glorïosa? 66
Mo non havess’io mi sta infirmitàe,
che ve ne troverave de divine,
mi ve ne troverave de sfozàe! 69
Benché, se vu sé de queste lane fine,
se de ste cose v’intendé de bello,
cerniré vu le ruose da le spine. 72
Za che volé co’ voio mi, fradello,
st’humor ch’havé no so se no laudarlo,
a non voler un putanin mengrello, 75
ma un putanon da poder abrazarlo,
e che vedé che la staga ben co ’l cuogo.
Vu volé de ste donne che ve parlo: 78
laudo il vostro consegio e sì m’el tuogo
per mi medemo, e si mai me renuovo,
che no vadagna mai quando che zuogo! 81
Per le rason che me disé, me muovo
mi e son da la vostra infina in cào:
cusì co’ son, talvolta anche mi il pruovo! 84
Catevene una, el digo da recào,
catevene una, e no de ste meschine
che n’ha tete né cul, che n’ha del fiào; 87
no tolé, pol far Dio, de ste nanine,
e no vardé velùo né damaschin,
ma bona carne e tutte robe fine. 90
Cateven’ una da chiavarla fin
ch’u saré straccho e ch’è, s’u saré bon,
da chiavarla dal vesporo al matin; 93
ch’anch’essa sia, fé conto, un bastïon
o un castello, una torre, una rocca,
che staga a mille botte de canon 96
[…]